Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti men Qazaqstan teńiz ýnıversıtetiniń birlesip uıymdastyrýymen atalǵan ýnıversıtet janynan «Sanaly urpaq – jarqyn bolashaq» jobasy boıynsha front-ofısi jáne «Adaldyq dúkeni» ashyldy.
Joba maqsaty - bilim berý júıesindegi sybaılas jemqorlyqty joıý, bilim berý júıesi arqyly sybaılas jemqorlyqty jalpy qabyldamaý úshin jaǵdaı jasaý jáne de elimizdiń bilim berý mekemelerinde ozyq tájirıbeni odan ári paıdalaný úshin pılottyq baǵyttardy iske asyrý negizinde quryldy. Bul týraly agenttiktiń aýmaqtyq departamenti basshysynyń orynbasary Qaırat Baıgebaev jáne ýnıversıtettiń prorektory Aqylbek Ahmetov aıtty.
О́z kezeginde, aýmaqtyq departamentpen Qazaqstan teńiz ýnıversıteti arasynda jobany iske asyrý boıynsha memorandýmǵa qol qoıylyp, oblys aýmaǵyndaǵy joǵarǵy jáne orta arnaýly oqý oryndarynyń tarapynan jobanyń jaýapty tulǵalary bekitildi.
Al, «Adaldyq dúkeniniń» ashylý maqsaty – stýdentter men jastardyń boıyna adaldyq qasıetterin sińirý, olardy adaldyqqa jáne ádeptilikke baýlý bolyp tabylady.
Iаǵnı, kez-kelgen stýdent satýshysy bolmaıtyn atalǵan dúkennen ózine qajetti taýardy belgilengen quny boıynsha tıisti baǵasyna satyp alyp, aqshasyn arnaıy qoıylǵan kassaǵa ótkizedi. Osylaısha, eshbir qadaǵalaýshysy joq dúkennen qajetti zatyn satyp alǵan stýdent qýlyqqa nemese qııanatqa jol bermeı, ózin adaldyqqa jáne ádildikke tárbıeleı alady.
Aldaǵy ýaqytta osyndaı is-sharalar oblysymyzdyń ózge de joǵarǵy jáne orta arnaýly oqý oryndarynda jalǵasyn tabatyn bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy